كرومبو :- مساء الخير اعزائى واعزائاتى النهارده كنت قاعد
قاعده صفا مع المدام بتاعتى ( ربنا ما يحرمنى منها ) القصد
لقيت سحس بيتصل بيا وهو بيرقع بالصوت
سحس :- الحقنى يا كرومبو عربيتنا اتسرقت اه يانى يانى اه
يا شماته ابله ظاظا فيا
كرومبو :- ابله ظاظا مين ؟
سحس :- بلاش انت ياكرومبو خليك فى حالك الله يسترك
كرومبو :- خلاص يا سحس قابلنى دلوقتى ونشوف الموضوع
ده بعد ربع ساعه فى الكافيه بتاعنا
وكالمعتاد وما تعودت عليه من مواعيد سحس المظبوطه وصل بعد
3 ساعات ونص من اتفاقنا المهم اتكلمنا وحكالى اللى حصل وقال......
سحس :- النهاردة الصبح اتصل بيا صديقى ( زمباوى ) صاحب
شركه ( زمبوء ) للادويه وقالى انه عاوزنى فى موضوع مهم
رحتله الشركه وركنت العربيه قدام الشركه وطلعت وقابلته
ولما نزلت كانت العربيه اتسرقت وكان فيه ثلاثه موجودين
فى المكان :- ( ابو سريع ) بتاع الجراج
( بلاميطه هايص فى الزيطه ) مسئول بوابه الامن
( كلاكس الخفيف ) سواق عربيه مندوب المبيعات
ولما سألنا الثلاثه قالوا :-
ابو سريع :- انا اصلا معرفش ان سحس باشا منورنا لانه كان
راكن العربيه عند البوابه مش فى الجراج عموما اهى وجودها
زى عدمه
ولما سألنا ( بلاميطه ) قال ....
بلاميطه هايص فى الزيطه :- لا ياكرومبو انا كنت عند البوابه بنظم
المرور وبعدين عيب اوى انى اسرق العربيه دى. دى مفيش زيها
اتنين فى البلد دى كفايه انها اوتوماتيك.........
ولما سألنا ( كلاكس ) قال :-
كلاكس الخفيف :- والله يا كرومبو انا كان عندى شحنه بوزعها وكنت
فى الطريق ولما وصلت كانت العربيه موجوده دخلت لمؤاخذه التواليت
انت عارف الشتا بقى ولما خرجت كانت العربيه مش موجوده
صحيح هى العربيه دى بتمشى بزيت عباد الشمس ؟
سحس :- العربيه ضاعت اهئ اهئ
كرومبو :- استرجل يا سحس هو فيه راجل بيعيط انا عرفت مين
اللى سرق العربيه انت عرفت
سحس :- لأ يا كرومبو لو عرفت كنت هاكلمك برضه ؟
كرومبو :- اه صحيح .... بس انا عرفت مين اللى سرق العربيه
يا ترى انت كمان عرفت مين هو ؟
( ابو سريع – بلاميطه هايص فى الزيطه – كلاكس الخفيف )
من طرف moo.nofal90 الجمعة أبريل 17, 2015 12:42 am
